༄༅།།སྟོན་ཁ།

བརྗིད་ཉམས།

དྭངས་གསལ་ནམ་མཁའ་མཐིང་མདོག་གཡུ་ལྟར་སྔོ། །
ལྷུན་སྟུག་ཆུ་འཛིན་ཞོ་གསར་སྤུངས་ལྟར་མཛེས། །
སྒེག་ལྡན་ནོར་འཛིན་ཁ་དོག་གསེར་གྱི་མདངས། །
འདི་དག་སྟོན་ཟླ་གསུམ་གྱི་བརྗིད་ཉམས་རེད། །

སྨྲེང་བ།

འབྲུག་སྐད་ཡལ་བའི་དགུང་སྔོན་དབེན་ཞིང་འཇམ། །
མེ་ཏོག་ཡལ་བའི་ནེའུ་གསིང་སྟོང་ཞིང་དབུལ། །
ལོ་མ་འཐོར་བའི་སྡོང་པོ་ཕྲ་ཞིང་རིང་། །
འདི་དག་སྟོན་ཟླ་གསུམ་གྱི་སྨྲེང་ཚུལ་ཡིན། །

ཆོས་ཉིད།

མཚོ་ཁའི་མགྲིན་རིང་ལྷོ་ཕྱོགས་མོན་ལ་འཕུར། །
སྤང་ཁའི་གཡུ་སྦྲང་ལྔ་པའི་ལམ་དུ་བྱོན། །
སྣ་ཚོགས་རྐང་འཐུང་སད་དང་སེར་བས་བཅོམ། །
འདི་དག་མི་རྟག་དུས་ཀྱི་ཆོས་ཉིད་ཡིན། །

སྔོན་བརྡ།

ཁ་བའི་མཛེས་སྡུག་རི་བོའི་འདབས་སུ་བསྙེགས། །
རླུང་བུའི་འུར་སྒྲ་འཇག་མའི་རྩྭ་དང་འགྲོགས། །
གྲང་ལྷགས་དལ་འབབ་ཆུ་དང་འགྲོགས་ནས་ཡོང་། །
འདི་དག་སྟོན་མཇུག་དགུན་གྱི་སྔོན་བརྡ་ཡིན། །