༄༅།།སྔོ་ལོའི་བུ་མོ་ནེའུ་ཆུང་མས་སྤྱི་དཔོན་ལ་བླངས་པའི་གླུ།
གླུ་ཐ་ལ་ལ་མོ་ཐ་ལ་རེད། །
གླུ་ཨ་ལ་ལ་མོ་ཨ་ལ་རེད། །
གླུ་ཐ་དྲུག་གླུ་ཡི་འདྲ་དྲུག་ཡོད། །
ཤར་ནས་ཁྲི་གདུགས་ཐ་ལ་ལ། །
ལྷོ་ནས་ལྷོ་སྤྲིན་ཐ་ལ་ལ། །
ནུབ་ནས་གྲིབ་སོ་ཐ་ལ་ལ། །
བྱང་ནས་སྐྱི་སེར་ཐ་ལ་ལ། །
ཕ་བླ་མའི་གསུང་ཆོས་ཐ་ལ་ལ། །
དཔོན་བཟང་པོའི་ཞལ་ཏ་ཐ་ལ་ལ། །
ཐུ་ལུ་གླུ་ཡི་འདྲ་གསུམ་ཡོད། །
རི་མཐོན་པོའི་ཁ་ཆུ་ཐུ་ལུ་ལུ། །
དམའ་རྒྱ་མཚོའི་རླངས་པ་ཐུ་ལུ་ལུ། །
མི་ངན་པའི་ཚིག་ངན་ཐུ་ལུ་ལུ། །
འབྲུ་དྲུག་གླུ་ཡི་འདྲ་དྲུག་ལེན། །
གནམ་ལ་སྐར་མ་སྨིན་དྲུག་ཤར། །
ས་ལ་ལོ་ཡག་འབྲས་དྲུག་སྨིན། །
ཆོས་ལ་མ་ཎི་འབྲུ་དྲུག་གྲགས། །
བོད་ལ་མིའུ་གདོང་དྲུག་ཡོད། །
སྟོང་སེམས་ཅན་འཁོར་བ་རིགས་དྲུག་གནས། །
ས་འདིའི་ས་ངོ་མ་ཤེས་ན། །
ཕ་རི་རྨ་ལ་ཚུ་རུ་རྫ། །
རྨ་རྫ་གཉིས་ཀྱི་ཁ་བར་ན། །
ཁྲ་སྟོད་ནམ་མཁའ་ལངས་པ་ནས། །
ཁྲ་ཕས་ཀི་ཀི་སྒྲོགས་པའི་ས། །
ཁྲ་མས་བསྭོ་བསྭོ་འབོད་པའི་ས། །
ཁྲ་ཕྲུག་གཤོག་རྩལ་སྦྱོང་ས་ན། །
ཁྲ་མཁར་གནམ་རྫོང་ཕྱུག་མོ་རེད། །
ང་དང་ང་ངོ་མ་ཤེས་ན། །
སྔོ་རིང་གད་པའི་གཡས་ཟུར་ན། །
གཡུ་མཚོ་སྔོན་མོའི་གཡོན་ཟུར་ན། །
སྔོ་ལོ་སྟོན་པའི་བུ་མོ་ཡིན། །
ནེའུ་ཆུང་ལུ་གུའི་ཚར་ཡག་ཡིན། །
གླུ་འདིའི་གླུ་ངོ་མ་ཤེས་ན། །
ནེའུ་ཆུང་ཅོ་ཀའི་དྲུག་འགྱུར་ཡིན། །
སྲུ་འབྲུག་མོས་མངགས་པའི་ཕོ་ཉ་ཡིན། །
གདོང་ཁུ་བོ་སྤྱི་དཔོན་རྒྱལ་པོ་ལགས། །
གསོན་དང་ཞུ་རྒྱུ་འདི་འདྲ་ཡོད། །
སེང་འབྲུག་མོའི་གླུ་ལ་འདི་འདྲ་གྲགས། །
དུས་ད་ལོའི་གནམ་ལོ་ཤར་ནས་བཟུང་། །
སྔར་མགོ་ལས་ཀྱི་འདྲ་མིན་དེ། །
དུས་ད་ལོའི་མིག་གིས་མཐོང་བཞིན་ཡོད། །
ཡོང་མ་མྱོང་ལས་གཅིག་བྱུང་ངོ་ཟེར། །
ཁེ་ཉིན་ཉི་མའི་སྔ་དྲོ་ལ། །
བྱ་ཁྭ་ཏ་གཅིག་གི་འཕྲིན་པ་བྱུང་། །
ཁ་སང་ཉི་མའི་དགོང་ཁ་ལ། །
བྱ་ལྟ་བ་མིག་གིས་མི་བཟོད་ཅིང་། །
བསམ་པས་བརྗོད་ཀྱིས་མི་ལང་བ། །
གར་བྱུང་འདི་བྱུང་མ་རིག་པར། །
གཡུ་སྦྲའི་མགོ་ལ་བབས་ནས་གདའ། །
ལས་ལོ་ལེ་ཉན་ལེ་ཡིན་ལེ་མེད། །
སང་ཉིན་ཉི་མའི་གདོང་གང་ལ། །
མཐོ་རི་བོས་གསེར་ཞྭ་གྱོན་དུས་དེར། །
ཚོ་ཆེན་ལྷ་སྡེ་དཀར་པོ་དེ། །
རྨ་དེའུ་ཡག་སྟག་ཐང་ཁྲ་མོ་ལ། །
ཀི་གཅིག་གི་འོག་ལ་བསྡུ་དགོས་ཟེར། །
མི་སྲིད་ལས་ལ་ལ་ཐང་མེད། །
སྨུག་པོ་འཇང་དང་སེར་པོ་ཧོར། །
མོན་རོང་གི་ལས་དམག་ཡོང་ལེ་འདྲ། །
ཡང་མིན་ན་ཡར་ཁམས་བྱང་མ་ནས། །
སྐུ་རྗེ་གེ་སར་རྒྱལ་པོ་ཁོང་། །
བདུད་ནག་པོར་ཤོར་རྒྱུ་ཨེ་མ་ཡིན། །
ལས་ཅི་ཡིན་གྱི་སྐད་ཆ་དགོས་ཏེ་ཟེར། །
བློ་སྔོན་ལ་དྲན་ན་དགའ་འོ་ཟེར། །
ལས་རྒྱབ་ནས་འགྱོད་ཚེ་འཕྱིས་སོ་ཟེར། །
སྲུ་འབྲུག་མོ་ཕྱིར་རྗེས་ཡོང་བཞིན་ཡོད། །
ང་ནེའུ་ཆུང་སྔོན་ལ་མངགས་ལེ་རེད། །
གདོང་ཁུ་བོ་སྤྱི་དཔོན་ཐུགས་ལ་ཞོག །
དུས་གཅིག་ཏུ་འཛོམས་ན་གྲོས་ཡོད་ཟེར། །
བསམ་བློ་བཞི་གསུམ་བཅུ་གཉིས་ཐོངས། །
བློ་རྩེ་ཉི་ཤུ་རྩ་ལྔ་ཁོད། །
མ་གོ་ལས་ལ་མ་ཟེར་ལགས། །
གླུ་འཁྲུལ་བ་སོང་ན་མཐོལ་ལོ་བཤགས། །
ངག་འཆལ་བ་སོང་ན་བཟོད་པར་བཞེས། །