༄༅།།བོད་ཀྱི་རྒྱན་གོས་ཀྱི་རིན་ཐང་གླེང་བ།

གོས་རྒྱན་ནི་མིའི་རིགས་དང་རང་བྱུང་ཁམས་གཉིས་ཡུན་རིང་དུ་མཉམ་དུ་གནས་པ་ལས་གྲུབ་པའི་རིག་གནས་ཀྱི་གཏེར་རྫས་ཤིག་དང་ས་ཁོངས་རིག་གནས་ཀྱི་མེ་ལོང་ལྟ་བུ་ཞིག་ཏུ་སྣང་། ནམ་ཟླའི་ཆ་རྐྱེན་དང་རང་བྱུང་ཁོར་ཡུག་གི་ས་བབ་མ་འདྲ་བ་ལས་གོས་རྒྱན་གྱི་ས་ཁོངས་ཁྱབ་ཚུལ་དང་དབྱེ་བ་ལ་མཐོ་སྒང་འབྲོག་ཁུལ་དང་ཞིང་འབྲོག་ས་ཁུལ། ཞིང་ནགས་ས་ཁུལ། ཞིང་ལས་ས་ཁུལ་བཅས་སུ་དབྱེ་ཆོག་སྟེ། དམིགས་བསལ་བྱེད་སྒོ་དང་ཡུལ་སྲོལ་གོམས་གཤིས་ཀྱི་ཆ་ནས་ལས་རིགས་རྒྱན་གོས་ཞེས་ཀྱང་ཡོད།

གོང་དུ་བརྗོད་པའི་ཞིང་ནགས་ས་ཁུལ་གྱི་གོས་རྒྱན་ནི་ཡུལ་ལུང་གི་ཆ་ནས་མུ་རྒྱུད་གཅིག་ཏུ་འབྲེལ་ཡང་ཀྱག་ཀྱོག་གི་རི་ལུང་དང་གཙང་པོའི་བར་མཚམས་བཅད་པ་སོགས་འགྲོ་འོང་ཆེར་མེད་པས། གོས་རྒྱན་གྱི་ཐོག་མའི་གྲུབ་ཚུལ་ལ་ཕན་ཚུན་གྱི་ཤུགས་རྐྱེན་ཐེབས་མེད་པར་ས་གནས་ཀྱི་རང་བྱུང་ཁོར་ཡུག་གི་བབ་དང་བསྟུན་ཡོད་ཕྱིར་རང་སོར་གྱི་ཁྱད་ཆོས་ཡན་གར་བ་རེ་ལྡན་པ་དང་། གཞན་ཞིང་འབྲོག་ཁུལ་དང་ཞིང་ལས་ཁུལ། མཐོ་སྒང་འབྲོག་ཁུལ་གྱི་གོས་རྒྱན་ནི་ཞིང་ནགས་ཁུལ་གྱི་གོས་རྒྱན་དང་མི་འདྲ་བར་ས་བབ་ཅུང་སྙོམས་ཤིང་ཐང་ཡངས་པ། འགྲོ་འོང་སྟབས་བདེ་བ། གནའ་བོའི་ཚོང་ལམ་གྱི་བརྒྱུད་ལམ་མང་བས་ཕན་ཚུན་འགྲོ་འོང་དང་རིག་གནས་སྤེལ་རེས་ཀྱི་ཚད་ཀྱང་ལྟོས་བཅས་ཀྱིས་མང་བར་མ་ཟད། རང་བྱུང་ཁོར་ཡུག་གི་ས་བབ་དང་ནམ་ཟླའི་འགྱུར་ལྡོག་ལ་ཁྱད་པར་ཆེན་པོ་མེད་པས། གོས་རྒྱན་གྱི་རྒྱུ་དབྱིབས་མདོག་གསུམ་དང་དེ་ལས་སྣང་བའི་རིག་གནས་མཚོན་དོན་གྱི་ཐད་ནས་འདྲ་བའི་ཆ་ཤིན་ཏུ་མང་། དཔེར་ན་རྨ་རྒྱལ་སྦོམ་ར་དང་གངས་རིའི་གཟུགས་ལྟར་གྲུབ་པའི་ཕྱིང་ཞྭ་དང་། མངའ་རིས་བུ་མོའི་རྨ་བྱའི་རྒྱ་ཁེབས། ཁམས་པའི་ཕོ་རྒོད་ཀྱི་རལ་པའི་ཅ་ལ་དམར་པོ། ཀོང་པོའི་ཡུལ་གྱི་སྟག་ལྤགས་གཟིག་ལྤགས་ཀྱི་སྟོད་གོས། དབུས་གཙང་བུ་མོའི་གཡུ་བྱུར་གྱིས་ཕྲ་བརྒྱན་པའི་སྤ་ཕྲུག་མགོ་རྒྱན། "ཞྭའི་སྟེང་དུ་བྱ་སྒྲོ་དང་ཅ་ལ་དམར་པོས་བརྒྱན་པ་དང་། གོས་ཀྱི་གོང་བར་གཡུང་དྲུང་དང་འཁོར་ལོ། རི་དང་ལོ་མ་ཅན་གྱི་དར་གོས་སོགས་སྦྱར་ཡོད་པ་དང་། འདབས་ཁར་རྒྱ་གྲམ་རི་མོ་ཅན་གྱི་ཕྲུག་ཁྲ་དང་། ཁ་དོག་སྣ་ཚོགས་གང་རུང་བའི་དར་སྐུད་ཀྱིས་བརྒྱན་པ། ད་དུང་སྐུད་པ་དཀར་ནག་དམར་གསུམ་གྱིས་ཉི་འོད་དང་། འཇའ་རིས། སྤྲིན་རིས་སོགས་བཀོད་པ་ཡོད"[16]པའི་གོས་རྒྱན་གྱི་བཟོ་དབྱིབས་དང་དེ་ལ་བརྒྱན་པའི་རི་མོ་སྣ་ཚོགས་ཤིག་མཆིས་ཤིང་། དེ་དག་ནི་གྲུབ་ཚུལ་ནི་རང་བྱུང་ཁམས་ཀྱི་སྣང་ཚུལ་དང་ནམ་ཟླའི་འགྱུར་ལྡོག་གི་རྐྱེན་དང་རྒྱུ་དུ་མ་ལ་བརྟེན་ནས་བསྐྲུན་པ་ཞིག་ཡིན་ཕྱིན། བོད་ཀྱི་གོས་རྒྱན་གྱི་སྟེང་ནས་མདོ་དབུས་མཐོ་སྒང་གི་ས་ཁམས་ཁོར་ཡུག་གི་ཁྱད་ཆོས་དང་ས་ཁོངས་རིག་གནས་ཀྱི་ངོ་བོ་མི་འདྲ་བ་མཚོན་ངེས། མགོ་བོའི་ཞྭ་མོ་དང་མགོ་རྒྱན་སོགས་ཀྱིས་གངས་རི་དང་རུས་བླར་བཀུར་པའི་བླ་རི་སོགས་མཚོན་པ་དང་། ཁོག་སྟོད་ཀྱི་གོས་རྒྱན་གྱིས་ཁོད་ཡངས་པའི་རྩྭ་ཐང་དང་མཐོངས་ཆེ་བའི་ས་བབ་ཀྱི་ཆགས་ཚུལ་མཚོན། ཁོག་སྨད་ཀྱི་གོས་རྒྱན་གྱིས་ས་ཁོངས་དེ་ལ་གནས་པའི་རི་དྭགས་གཅན་གཟན་འདབ་ཆགས་སོགས་ཀྱི་ངང་རྒྱུད་ལ་དགའ་མོས་བྱེད་པ་སོགས་མཚོན་ལ། དེར་བརྟེན་རང་བྱུང་ཁོར་ཡུག་གིས་སྤྱི་ཚོགས་ཁོར་ཡུག་དང་མི་ཆོས་ཁོར་ཡུག་བསྐྲུན་ཏེ་ཤེས་རིག་གི་ཆུ་རྒྱུན་རིང་ནས་རིང་དུ་འཕེལ་རྒྱས་བྱུང་བ་ནས་རིམ་འགྱུར་འབྱུང་བཞིན་པའི་དུས་འདིར། ངོ་བོ་མ་འགྱུར་བའི་གདོད་མའི་རིག་གནས་ཀྱི་སྣང་ཚུལ་ལ་ཕྱིར་རྟོག་བྱེད་དགོས་ན་གོས་རྒྱན་རིག་གནས་ཀྱི་མཚོན་དོན་མི་འདྲ་བ་ལས་བསེད་དཀྲོལ་བྱེད་དགོས་པས། གོས་རྒྱན་ནི་ས་ཁོངས་རིག་གནས་ཀྱི་མེ་ལོང་ལྟ་བུ་ཡིན་ཞེས་སྨྲས་ཀྱང་འགལ་བ་མེད་པར་འདོད་དོ། །