༄༅།།སེང་ཆེན་གྱིས་གྲུ་པ་འདུལ་བའི་གླུ་སྐྱ་འགྱུར་རིང་མོའི་རྟ་ལ་དྲངས་ནས་འདི་ལྟར་བླངས་སོ། །
གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
མཁྱེན་པས་གཟིགས་དང་གོང་མ་ལྷ། །
རིགས་གསུམ་མགོན་པོས་བྱིན་གྱིས་རློབས། །
ཨོ་རྒྱན་པདྨས་ཐུགས་རྗེས་ཟུངས། །
དགྲ་བགེགས་འདུལ་བའི་སྟོངས་གྲོགས་མཛོད། །
ས་འདི་ས་ངོ་མ་ཤེས་ན། །
ཧོར་ཆུ་ཁམ་པའི་གྲུ་སོ་རེད། །
ང་དང་ང་ངོ་མ་ཤེས་ན། །
འཛམ་གླིང་སྐྱོབ་པའི་ལྷ་སྐལ་ཡིན། །
མ་གཡེལ་གཟིགས་དང་གོང་མ་ལྷ། །
ཧོར་སེར་བདུད་ཀྱི་སྒོ་སྲུང་ལ། །
ཉ་པའི་ཨ་མགོ་ལྕགས་མིག་དང་། །
སྦལ་པའི་མི་བཙན་ཁ་ཤོ་གཉིས། །
ཡང་གཡོག་གྲུ་པའི་འཁོར་དང་གསུམ། །
དུག་གསུམ་སྲིད་པའི་གཞི་མ་འདི། །
དེ་རིང་དག་པའི་ཞིང་ལ་སྤོར། །
ཕྱི་མ་ཆོས་དང་ལྡན་པའི་ལུས། །
སེང་ཆེན་སྐྱེས་བུའི་གདུལ་བྱར་ཤོག །
ཧོར་ཆུ་སྡུག་བསྔལ་རྒྱ་མཚོ་ལས། །
ཐུགས་རྗེ་ཐབས་ཀྱིས་གྲུ་གཅིག་བཙུགས། །
ཡེ་ཤེས་རང་ཤར་སྐྱ་བས་དཀྲུགས། །
ཉོན་མོངས་ཀླུ་ཐེལ་མིང་སྲུང་གསུམ། །
དེ་རིང་སྐྱ་བས་ཆམ་ལ་ཕོབས། །
ཆོས་སྐྱ་དུང་གི་མཆོད་རྟེན་འདིས། །
དུག་ལྔ་མི་དམིགས་ངང་ལ་གནོན། །
རིགས་དྲུག་བདེ་བའི་ཡུལ་དུ་དྲོངས། །
མི་རིག་འཁོར་བའི་ཆུ་བོ་འདི། །
རིག་པའི་ངོ་བོ་ཆོས་སྐུའི་རྟེན། །
དུང་གི་མཆོད་རྟེན་དཀར་ཆུང་འདིས། །
ཐུགས་རྗེས་ཆུ་ལ་བསྒྱུར་རོགས་མཛོད། །
གྲུ་པ་ཉོན་མོངས་དུག་གི་མི། །
ཞེ་སྡང་ལྕགས་ཀྱི་ཨ་འབྲས་ཅན། །
སྟོང་ཉིད་ལྟ་བའི་ངང་དུ་ཐུལ། །
གཏི་མུག་ཁ་ལ་ཡང་ཤམ་ཅན། །
སྟོང་ཉིད་ལྟ་བའི་ངང་དུ་ཐུལ། །
གཏི་མུག་ཁ་ལ་ཡང་ཤམ་ཅན། །
འོད་གསལ་ཆོས་སྐུའི་རྒྱ་ཡིས་ཐོབ། །
འདོད་ཆགས་བཙན་པོའི་ལྟོགས་སླ་ཅན། །
བདེ་ཆེན་དག་པའི་རྒྱུད་ལ་སྦྱོར། །
མ་དག་བདུད་ཀྱི་གྲུ་པའི་འཁོར། །
དག་པ་ཆོས་སྐུའི་ཞིང་དུ་སྐྱོལ། །