༄༅།།ཧོར་གྱི་ཐེའུ་རང་བུ་མོ་སྤུན་གསུམ་གྱིས་བླངས་པའི་གླུ།
གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
མཁྱེན་པས་གཟིགས་དང་ཧོར་གྱི་ལྷ། །
ནམ་མཁའི་རླུང་རྫོང་གོང་མ་ནས། །
གནམ་ཐེལ་སྲིད་པའི་འོད་འབུམ་དེ། །
མི་དཀར་སྤྲིན་གྱི་ཐུ་ལུ་ཅན། །
ར་དཀར་དུང་གི་རྣ་ཚར་ཅན། །
དུང་ཤོ་དཀར་པོ་ཕྱག་ན་བསྣམས། །
སྲིད་པ་ཤོ་ཡི་ཡ་བདག་ཁྱེད། །
དེ་རིང་དུང་ཤོའི་ཁ་འཛིན་མཛོད། །
གུར་མཚོའི་ལག་ཏུ་རྒྱན་སྐལ་ཞོག །
བར་སྣང་སྟོང་པའི་ཐོག་རྫོང་ནས། །
བར་ཐེལ་སྲིན་པའི་རྒྱང་གྲགས་དེ། །
མི་སེར་འཇའ་ཡི་ཐུ་ལུ་ཅན། །
ར་ཁྲ་རྒོད་ཀྱི་ཡང་དོམ་ཅན། །
དུང་ཤོ་དཀར་པོ་ཕྱག་ན་བསྣམས། །
སྲིད་པ་ཤོ་ཡི་ཁ་ལོ་བསྒྱུར། །
དེ་རིང་དུང་ཤོའི་ཁ་འཛིན་མཛོད། །
རྒྱན་གཉིས་གསེར་མཚོའི་ལག་ཏུ་སྤྲོད། །
ས་གཞི་ལྕགས་རྫོང་འོག་མ་ནས། །
ས་ཐེལ་སྲིད་པའི་གྲོང་འཇོམས་ལགས། །
མི་ནག་དུང་གི་ཐུ་ལུ་ཅན། །
ར་ནག་དར་ནག་ཅོད་པཎ་ཅན། །
དུང་ཤོ་དཀར་པོ་ཕྱག་ན་བསྣམས། །
སྲིད་པ་ཤོ་ཡི་སྣ་འདྲེན་མཛོད། །
དེ་རིང་ཤོ་ཡི་སྐྱོར་ཡ་མཛོད། །
རྒྱན་གསུམ་གཡུ་མཚོའི་ལག་ཏུ་བྱིན། །
ཡང་མཁར་ཟི་ར་རྫོང་ཆེན་ནས། །
ཐེལ་མོ་སྲིད་པའི་གྲོང་རྒྱུག་མ། །
ནག་མོ་རྒོད་ཀྱི་ཐུ་ལུ་ཅན། །
ཟངས་ཀྱི་དྲེད་མོ་རྒྱ་བོར་བཅིབས། །
ཕྱག་ན་དུང་ཤོ་དཀར་པོ་བསྣམས། །
སྲིད་པའི་ཤོ་དཔོན་བདག་མོ་ཡིན། །
དེ་རིང་དུང་ཤོའི་རི་མོ་འཚོས། །
རྒྱན་ཁ་ཨ་ལྕེ་གསུམ་ལ་གཏོད། །
དེ་རིང་དུང་ཤོ་ལྷ་ཡི་རྫས། །
མཐོ་བ་གནམ་ལ་མ་ཡར་དགོས། །
བཅོ་བརྒྱད་གོང་མེད་མ་འབབ་དགོས། །
དམའ་བ་ས་ལ་མ་ལྷུང་དགོས། །
སུག་གུ་རྐང་ཐུང་མ་འབབ་དགོས། །
བར་སྣང་རླུང་གིས་མ་བཀྱག་དགོས། །
བཅུ་ཁ་རྡེལ་ཚང་མ་འབབ་དགོས། །
རེ་འབྱམ་ལ་མོ་མ་རྒྱབ་དགོས། །
ཡ་མེད་བསྟུད་གྲངས་མ་མང་དགོས། །
སྲིད་པ་ཁ་གཅོད་དེ་དང་གཅིག །
སུག་གུ་རྐང་གླང་དེ་དང་གཉིས། །
བདུད་མཁར་ས་མེད་དེ་དང་གསུམ། །
དེ་གསུམ་ཤོ་ཡི་རྟིང་མ་ཡིན། །
ཤོ་རྟིང་ལག་ཏུ་མ་འོང་དགོས། །
ས་ར་ཆགས་པའི་ལྷ་མཁར་ཡིན། །
བརྒྱད་དཀར་ལྷ་རྫོང་གོང་མ་ཡིན། །
བཅོ་ལྔ་སྲིད་པའི་ཁ་རྫོང་ཡིན། །
དེ་གསུམ་གོང་མ་ལྷ་ཤོ་ཡིན། །
ལྷ་ཤོ་དགྲ་ལ་མ་ཤོར་ཅིག །
གསུམ་གཅིག་ཤོ་ཡི་མགོ་འདྲེན་ཡིན། །
དྲུག་པོ་ཤོ་ཡི་གཞི་མ་ཡིན། །
ལྕམ་མོ་ཕྱུག་གི་སྣ་ལེན་ཡིན། །
དེ་གསུམ་ཐེལ་མོའི་ལག་ཏུ་ཞོག །
ཁ་གསུམ་མཐུད་ཤོའི་རྟིང་མ་ཡིན། །
བེ་ར་ཤོ་ཡི་ལུག་ར་ཡིན། །
གཡས་ལེན་གཡང་གི་ཕུར་པ་ཡིན། །
དེ་གསུམ་རྒྱལ་འདོད་སྨན་ལ་གཏོད། །
བཅུ་གཅིག་སྲིད་པའི་སྒ་ལེན་ཡིན། །
བཅུ་གསུམ་ལ་ཁའི་སོ་བ་ཡིན། །
རྒྱ་སྒྲོམ་ནོར་གྱི་ར་བ་ཡིན། །
དེ་གསུམ་གོང་མའི་ལྷ་སྐལ་མཛོད། །
ཤོ་མིག་སྟོང་ལ་མ་བསྒྱུར་དགོས། །
གཉིས་ལྔ་རང་ཁ་མ་སྟོད་ཅིག །
ཁ་ཟུར་རྣོན་པོ་མ་འདྲ་དགོས། །
བདུན་དགུ་རང་ལ་མ་སྟོན་ཅིག །
ཤོ་གཡང་གཞན་ལ་མ་ཤོར་དགོས། །
ས་ར་མི་ལ་མ་འགྲིམ་དགོས། །
ཤོ་མཐའ་མི་ལག་མ་བྱུང་དགོས། །
རེ་འབྱམ་རང་ལག་མ་འཇོག་ཅིག །
གོང་མའི་ལྷ་ཞལ་མ་གནག་དགོས། །
ཤོ་ཟུར་གནམ་ལ་མ་སྟོན་ཅིག །
ཤོ་མིག་རྩིས་དྲུག་མ་ནོར་ཅིག །
ཟུར་ཤོ་རྩིས་ལ་མ་འདྲེན་ཅིག །
ཤོ་འཕྲོས་རྡོག་ལམ་མ་འཁྱར་དགོས། །
ས་ར་ཁེར་འགྲོས་མ་བྱེད་ཅིག །
ཤོ་ལམ་གྲོགས་ལ་མ་བཟུར་དགོས། །
དྲུག་འགྲོས་ལ་ལ་མ་འགྲོ་ཞིག །
དུང་ཤོ་མ་བུ་མ་འབྲལ་དགོས། །
ཤོ་མགོ་སྣ་འདྲེན་མ་ཉེས་དགོས། །
ལྕི་ལེན་སུག་པ་མ་འབབ་ཅིག །
དུང་ཤོ་དགྲ་ལ་མ་ཐུག་ཅིག །
ས་ར་ལམ་ཁས་མ་གཅོད་ཅིག །
ལྷ་ཤོ་ནང་འཁྲུག་མ་བྱེད་དགོས། །
ཤོ་ལམ་ཆུ་ཡིས་མ་བག་ཅིག །
དབང་ཐང་ཆེ་ན་ལྷ་གཡག་ཤོག །
ཀླུང་རྟ་དར་ན་ལྷ་མཁར་ཤོག །
ཅི་བསམ་འགྲུབ་ན་ལྕམ་མོ་ཤོག །
དེ་ནས་ལྷ་རྟེན་དུང་གི་ཤོ །
ལག་པའི་ཟུར་ནས་མ་འཐོར་དགོས། །
འཐོར་ན་ལྷ་མེད་ཡིན་པའི་རྟགས། །
ཤོ་གདན་པང་ནས་མ་ཡར་ཅིག །
ཡར་ན་བདེན་མེད་ཡིན་པའི་རྟགས། །
དུང་ཤོ་ལག་རྒྱུད་མ་ཤོར་ཅིག །
ཤོར་ན་ཁ་འཛིན་མེད་པའི་རྟགས། །
མི་རྒོད་ཁེར་རྒྱུག་རྭ་ཡི་གཞུ། །
མཆོག་དཀར་ཀླད་ནས་ཁུག་པར་ཤོག །
ཕོ་གསར་མོ་རྒུད་སྟག་མོའི་བུ། །
སྟག་ཕྲུག་མདའ་ཡིས་རྨས་པར་ཤོག །
ཨ་ཆེས་རྒྱན་ལ་ཅི་ལོན་ཚོ། །
གོང་མ་ལྷ་ཡི་ཤོ་རྟགས་ཡིན། །
ཁ་འཛིན་མཛད་པའི་སྐུ་དབང་མཛོད། །
རྟིང་མ་ལོན་པའི་དཔའ་དར་མཛོད། །
ཤོ་འདིར་ཁ་འཛིན་མ་བྱུང་ན། །
གླུ་འབོད་སྟོང་ལ་ལག་གཡུག་རེད། །
མཆོད་གནས་རྡོ་ལ་སྣུམ་བྱུགས་རེད། །
གསན་ན་གོང་མའི་གླུ་མཆོད་མཛོད། །
མ་གསན་ད་རུང་གླུ་ཞུ་འབུལ། །