༄༅།།སངས་རྒྱས་བསྟན་པའི་བཀའ་སྲུང་སེང་ཆེན་རྒྱལ།
བོད་ཆོལ་གསུམ་ཁམས་ཀྱི་ས་ཆ་ཡི།།
གནས་སྐྱིད་སོའི་ཡག་གི་ཁ་མདོ་རུ།།
ཡབ་སེང་བློན་དཔོན་དང་འགག་མོའི་སྲས།།
རྗེ་རིགས་གསུམ་ཀུན་འདུས་སེང་ཆེན་རྒྱལ།།
བདུད་མུ་སྟེགས་འདུལ་བའི་མཐུ་རྩལ་ཅན།།
མ་འགྲོ་བའི་མགོན་དུ་ཁྱེད་ཉིད་འཁྲུངས།།
ས་གླིང་ཡུལ་མཐོང་བ་ཀུན་སྨོན་ནས།།
ལས་ཞི་རྒྱས་དབང་དང་དྲག་པོ་བསྒྲུབས།།
གནས་རྫོང་ཆེན་རྫོང་ཆུང་ཆམ་ལ་ཕབ།།
གླིང་དཔའ་བརྟུལ་ཕུ་ནུའི་རྗེ་བོ་དང་།།
ཡང་ཕྱོགས་བཞི་དགྲ་བཞི་འདུལ་བའི་དཔོན།།
གླིང་སེང་ཆེན་བསམ་འཕེལ་ནོར་བུ་ཡིན།།
སྐུ་དཀར་ཕྱོགས་བསྟན་པའི་རྒྱལ་མཚན་དང་།།
གསུང་གནས་ལུགས་ཟབ་མོའི་སྒྲུང་རིང་ཡིན།།
ཐུགས་ངེས་གསང་རྫོགས་ཆེན་ཏིང་འཛིན་དང་།།
འཁོར་རིག་འཛིན་ཕོ་མོའི་ཚོགས་དཔོན་ཡིན།།
ཕྱི་ལོངས་སྤྱོད་ནོར་གྱི་གཏེར་སྒོ་ཕྱེས།།
ནང་དུས་འཁྲུགས་དམག་སྣ་ཁྱེད་ཀྱིས་བཟློག།
ཁྱེད་སྒོམ་ན་བླ་མ་ཀུན་འདུས་ཡིན།།
ཁྱེད་སྒྲུབ་ན་ཡི་དམ་ཀུན་འདུས་ཡིན།།
ཁྱེད་མཆོད་ན་ཆོས་སྐྱོང་ཀུན་འདུས་ཡིན།།
ཁྱེད་བདུད་བཞི་འདུལ་བའི་དམག་དཔོན་ཡིན།།
ཁྱེད་ཕྱི་མ་འདྲེན་པའི་བླ་མ་ཡིན།།
ཁྱེད་རྟ་རྒྱུགས་སྟོན་མོའི་རིག་གཞུང་ཡིན།།
ཁྱེད་སྟག་གཟིག་ནོར་གྱི་ནོར་བདག་དང་།།
ཁྱེད་དམྱལ་གླིང་མུན་པ་རང་བསལ་ཡིན།།
ཁྱེད་སྨུག་པོ་གདོང་གི་རུས་དཔོན་དང་།།
ཁྱེད་ཀུན་ལས་རྒྱལ་བའི་རྒྱལ་མཚན་ཡིན།།
ཁྱེད་ལོ་རྒྱུས་རིག་པའི་ཟིན་ཐོ་དང་།།
ཁྱེད་འཛམ་གླིང་ལྷ་སྒྲུང་རིང་མོ་ཡིན།།
གླིང་གེ་སར་བསམ་དོན་ཀུན་འགྲུབ་ཡིན།།
གླིང་གེ་སར་བྱིན་རླབས་རང་བྱོན་ཡིན།།
གླིང་གེ་སར་དངོས་གྲུབ་གཏེར་མཛོད་ཡིན།།
གླིང་གེ་སར་ཡོན་ཏན་ཀུན་འདུས་ཡིན།།
གླིང་གེ་སར་བསྟན་པའི་བཀའ་སྲུང་ཡིན།།
གླིང་གེ་སར་འདི་ཕྱིའི་སྐྱབས་གནས་ཡིན།།
༢༠༢༥ ༢ ༡༢ ཉིན་གླིང་རྗེ་གེ་སར་སྐྱེས་བུ་ཆེན་པོའི་འཁྲུངས་སྐར་སྐབས་ཀྱི་སྤྲེལ་རུས་རྐང་གིས་སེམས་ཚོར་ཐད་བྲིས་པ་དགེའོ།།