༄༅།།སྐུ་འབུམ་བྱམས་པ་གླིང་དུ་མེ་ཏོག་མཆོད་པ་དར་ཚུལ།
བོད་རབ་བྱུང་བཅུ་བའི་ཤིང་རྟ་ཕྱི་ལོ༡༥༩༤ལོར་ཟི་ན་བླ་མ་དཔལ་འབྱོར་རྒྱལ་མཚན་དང་དཔལ་འབྱོར་རིན་ཆེན་ཁུ་དབོན་གཉིས་ཀྱིས་སྐུ་འབུམ་བྱམས་པ་གླིང་གི་རྗེ་གསེར་སྡོང་ཆེན་མོའི་མདུན་གྱི་མགོན་ཁང་ཆེན་མོ་གསར་བཞེངས་ལེགས་འགྲུབ་ཀྱི་རབ་གནས་གནང་རྗེས། ལོ་དེའི་ཟླ་དང་པོའི་ནང་ནས་ཟི་ན་ཁུ་དབོན་གཉིས་ཀྱིས་སྦྱིན་བདག་གནང་སྟེ། སྐུ་འབུམ་བྱམས་པ་གླིང་དུ་ཆོ་འཕྲུལ་སྨོན་ལམ་དུས་ཆེན་གྱི་ཚེས་བཅོ་ལྔའི་དགོང་མོར་མར་བཟོས་མེ་ཏོག་མཆོད་པ་འབུལ་བའི་སྲོལ་དར།
དུས་དེ་ནས་བཟུང་སྐུ་འབུམ་བྱམས་པ་གླིང་གི་དགེ་འདུན་པ་ཚོས་ལོ་རེ་བཞིན་བོད་ཟླ་བཅུ་བའི་ཚེས་བཅོ་ལྔའི་ཉིན་ནས་བཟུང་མེ་ཏོག་མཆོད་པ་བཞེངས་འགོ་བརྩམས་ཏེ། ཕྱི་ལོའི་ཟླ་དང་པོའི་ཚེས་བཅོ་ལྔའི་བར་ཕལ་ཆེར་ཟླ་གསུམ་ལྷག་གི་རིང་མཐོ་ཚད་ཐོག་བརྩེགས་གསུམ་ལྷག་ཡོད་པའི་ཆོ་འཕྲུལ་མཆོད་རྟེན་གྱི་རྣམ་པ་ཅན། དཀྱིལ་དུ་གཙོ་སྐུ་ལོ་རེ་བཞིན་རྗེ་ཙོང་ཁ་པ་དང་རྗེ་བཙུན་འཇམ་པའི་དབྱངས། འཕགས་མཆོག་སྤྱན་རས་གཟིགས་སོགས་རེས་མོས་ཀྱི་སྒོ་ནས་བཞེངས་པ་དང་། གཡས་གཡོན་དུའང་ལོ་རེ་བཞིན་རེས་མོས་ཀྱི་སྒོ་ནས་སངས་རྒྱས་ཀྱི་མཛད་པ་བཅུ་གཉིས་དང་ཙོང་ཁ་བརྒྱད་ཅུ། རྒྱན་དྲུག་མཆོག་གཉིས་ཀྱི་མཛད་རྣམ། བོད་ཀྱི་རྣམ་ཐར་ཆེན་མོ་བརྒྱད། རྒྱལ་བ་པཎ་ཆེན་གྱི་རྣམ་ཐར། དེ་མིན་རྒྱ་གར་དང་བོད་ཀྱི་གྲུབ་མཐའ་རིས་མེད་ཀྱི་སྐྱེས་ཆེན་དག་གི་རྟོགས་བརྗོད། བོད་ཀྱི་ཆོས་རྒྱལ་རིམ་བྱོན་གྱི་ལོ་རྒྱུས་སོགས་བརྗོད་བྱར་བཟུང་སྟེ་བཞེངས་སྐྲུན་དང་། སྟེང་དུ་བཀྲ་ཤིས་རྟགས་བརྒྱད་དང་འདོད་ཡོན་རྣམ་ལྔ། མཐུན་པ་སྤུན་བཞི། ཚེ་རིང་རྣམ་དྲུག རྒྱལ་སྲིད་སྣ་བདུན་དང་། མཐའ་འཁོར་དང་བར་དང་བར་མཚམས་སུ་ཕྲ་ཚོམ་གྱི་མེ་ཏོག་དཀར་དམར་དང་། བྱ་དང་རི་དྭགས། རི་ཆུ་སོགས་ཀྱིས་བརྒྱན་པ་བཞེངས་ཏེ། ལོ་རེའི་ཧོར་ཟླ་དང་པོའི་ཆོ་འཕྲུལ་སྨོན་ལམ་ཆེན་མོའི་ཚེས་བཅོ་ལྔའི་དགོང་མོར། གནའ་བོའི་འཚེམ་དྲུབ་ཀྱི་ཐང་རྙིང་རིན་ཐང་ལྡན་པ་མང་པོའི་མཆོད་རྫས་བསམ་གྱིས་མི་ཁྱབ་པ་དང་བཅས་བཤམས་སྲོལ་བྱུང་།
ད་ལོའི་སྒོ་མང་འཛིན་གྲྭའི་མེ་ཏོག་མཆོད་པ།
ད་ལོའི་རྗེ་བཙུན་འཛིན་གྲྭའི་མེ་ཏོག་མཆོད་པ།
