༄༅།།

 གླུ་ཐ་ལ་ལ་མོ་ཐ་ལ་ལེན། །
   གླུ་ཨ་ལ་ལ་མོ་ཨ་ལ་ལེན། །
   ལྷ་མཁྱེན་གཅིག་གླང་ཆེན་འགྱིང་རི་ནས། །
   མགོན་ཕ་གཅིག་དམ་པ་སངས་རྒྱས་མཁྱེན། །
   སྒོས་ཡང་མཁྱེན་ཀུན་ཏུ་བཟང་པོ་མཁྱེན། །
   ཐུགས་མཁྱེན་པས་གཟིགས་དང་ཐུགས་རྗེས་ཟུངས། །
   ས་འདི་ཡི་ས་ངོ་མ་ཤེས་ན། །
   ས་གཞུང་ཆུ་སྔོན་མོའི་ཚུར་ཁུག་རེད། །
   མི་ང་དང་ང་ངོ་མ་ཤེས་ན། །
   ས་རྒྱ་ནག་གླང་ཆེན་འགྱིང་རི་ནས། །
   རྒྱ་ནག་གི་མི་ཆུང་ཐང་འབུམ་ཡིན། །
   དུང་དཀར་པོའི་མཆོད་རྟེན་ཁྲུ་གང་འདི། །
   གནས་གླང་ཆེན་འགྱིང་རིའི་ལག་རྟགས་ཡིན། །
   རིགས་ནག་པོ་རྒྱ་ཡི་ལས་ནོར་ཡིན། །
   ཉོ་འདོད་ན་མཆོད་རྟེན་བཙོང་རྒྱུ་ཡིན། །
   བརྗེ་འདོད་ན་ཆོས་དང་བརྗེ་རྒྱུ་ཡིན། །
   ད་དེ་ནས་གྲུ་པའི་དཔོན་པོ་ལགས། །
   ས་འདི་ལ་ས་མིང་ཅི་འདྲ་ཡོད། །
   མི་ཁྱོད་ལ་ལོ་རྒྱུས་ཅི་འདྲ་ཡོད། །
   ང་ད་ནངས་ཉི་མ་ཤར་ནས་འོངས། །
   མཐོ་ཁྲི་གདུགས་ལ་མོ་བརྒྱབས་ནས་འོངས། །
   ཞག་དོ་ནུབ་འདུག་པའི་གནས་གཅིག་གཡོར། །
   ཆོས་མཆོད་རྟེན་འཇོག་པའི་ཁྲི་གཅིག་རྩིགས། །
   ལྟོ་ཕོ་བ་རྒྱག་པའི་ཟས་གཅིག་གནོངས། །
   ཆུའི་ཕར་ལ་འགྲོ་བའི་བློ་གཅིག་སྟོན། །
   དེ་མིན་གཞུང་ཆུ་སྔོ་རིང་ཞེས། །
   ས་ནག་ལུང་པ་ཧུབ་ཀྱིས་འདྲེན། །
   ཆུ་ཆེན་གཤིན་རྗེ་འཕྲེད་ཉལ་ལ། །
   འགག་ཕྲའི་གྲུ་པ་གཞན་ལས་བཙན། །
   སྤྲང་ཧྲུལ་ཆུ་ལ་ཕུད་པ་ན། །
   ཆོས་ལ་དེ་བས་ཆེ་བ་མེད། །
   དེ་སྟེ་མི་ཆུང་ཐང་འབུམ་ངས། །
   དུས་རྒྱུན་སྨོན་རྒྱུ་ཆོས་ལ་སྨོན། །
   ཆོས་ཡོད་ལུས་གཅིག་མ་བླངས་བསམས། །
   དེ་རིང་གཞུང་ཆུ་ཁམ་པ་འདི། །
   ཁྲ་མོའི་མིག་གིས་མཐོང་ཚུན་ནས། །
   སྨོན་སྨོན་ཆུ་ནང་ཉ་ལ་སྨོན། །
   ལྟོ་དཀར་ལུས་གཅིག་མ་བླངས་བསམས། །
   དེ་སྟེ་གྲུ་པའི་དཔོན་པོ་ལགས། །
   ཉི་ནུབ་མགྲོན་པོའི་གནས་ཚང་དེ། །
   མི་བརྒྱབ་འཁོར་བའི་ཕ་མ་ཟེར། །
   ཡི་མུག་སྤྲང་པོའི་སྐྱབས་གནས་དེ། །
   སྨོན་ལམ་བརྒྱ་ཡི་མགོ་འདྲེན་ཟེར། །
   གྲུ་དཔོན་ཅི་ཡོད་ལོངས་སྤྱོད་ལ། །
   གཡོག་བརྒྱ་གསོ་བའི་ཁ་ཞོར་ནས། །
   མགྲོན་ཟས་ཞར་དང་ཞོར་ལ་འབྱུང་། །
   ལྷ་ཁང་མཆོད་པ་འབུལ་ཞོར་ནས། །
   སྐྱེ་མེད་དུང་གི་མཆོད་རྟེན་ལ། །
   མཆོད་འབུལ་ཞར་དང་ཞོར་ལ་འོང་། །
   མགྲོན་བརྒྱ་ཕུད་པའི་གྲུ་ཞོར་ལ། །
   ཉམ་ཆུང་ཟུར་ལ་བརྫངས་པས་ཆོག །
   མང་པོའི་ཞོར་ལ་གཏོང་རོགས་མཛོད། །
   གོ་ན་རྣ་བའི་བདུད་རྩི་ལ། །
   མ་གོ་གླུ་ཡི་འབྲེལ་བ་གྱིས་གསུངས། །