༄༅།།གླིང་འབུམ་དཔོན་ཐོག་རྒོད་འབར་བའི་ལོ་རྒྱུས།

བོད་འབངས་རྫོགས་ལྡན་གསར་པའི་ཞིང་ལ་བཀོད།།

རིག་འཛིན་ཆེན་པོ་སློབ་དཔོན་པདྨ་འབྱུང་།།

དད་པའི་རླབས་ཀྱི་དབུས་སུ་རྩེན་པར་མཛོད།།

 

སྐུ་ལ་དགྲ་ལྷ་ཝེ་མའི་སྐུ་ཤུགས་རྫོགས།།

གསུང་སྐད་ཐ་ལ་དྲུག་འགྱུར་དབྱངས་རྟ་སྙན།།

ཕྱོགས་བཞིའི་བདུད་རིགས་ཐལ་བ་རྡུལ་དུ་བརླགས།།

རིགས་གསུམ་སྤྲུལ་པའི་ཟློས་གར་སེང་ཆེན་རྒྱལ།།

 

རྔམས་བརྗིད་དཔའ་བོའི་སྙིང་སྟོབས་དགུང་ལས་མཐོ།།

འཁོར་འབངས་བུ་བཞིན་གཅེས་པའི་ཐུགས་བརྩེ་ཅན།།

གླིང་གི་དཔའ་ཐུལ་འབུམ་དཔོན་ཐོག་རྒོད་འབར།།

ངོ་མཚར་ལོ་རྒྱུས་རིང་མོ་འབྱམས་སུ་ཀླས།།

 

ལོ་ཟླའི་འཕོ་འགྱུར་ཁྲོད་ནས་རྙེད་པ་ཡི།།

དཔའ་མཛངས་སྐྱེས་བུ་གང་ཞིག་འབྱོན་བཞུགས་གནས།།

ངོ་མཚར་འབར་བའི་ལོ་རྒྱུས་རིང་མོའི་ཁྲོད།།

གཟུར་བོའི་བློ་ཡིས་ཅུང་ཟད་འབྲི་བར་བྱ།།

གཤིས་སུ་སྨིན་པའི་ལོ་རྒྱུས་རྣལ་མ་ལ།།

བལྟ་བ་འདོད་ན་ཁུངས་ཐུབ་ཡིག་ཚང་དང་།།

གཞུང་དྲང་རྒན་པོའི་ངག་ལས་རྟོགས་པར་གཅེས།།

 

ཕྱོགས་ལྷུང་གདོན་གྱིས་བསྲེ་སླད་མ་བྱས་ཤིང་།།

རང་བཟོ་བློ་ཡིས་རང་དགར་མ་བྲིས་པ།།

ཅུང་ཟད་བརྗོད་པ་དྲང་པོའི་ངག་ཚིག་གིས།།

རང་རིགས་གཞོན་ནུ་དག་ལ་སྐྱེས་སུ་ཕུལ།།

 

འདི་འབད་དགེ་བའི་འབྲས་བཟང་སྨིན་གྱུར་ན།།

རྒྱལ་བསྟན་ཕྱོགས་མཐར་མ་ལུས་ཁྱབ་པདང་།།

ལུས་ཅན་སྲིད་པའི་མཚོ་ལས་འདོན་པའི་ཕྱིར།།

རྣམ་དག་བསྔོ་བ་དམ་པས་ཟིན་པར་ཤོག།